விவசாய நடவடிக்கைக்காகச் சென்ற மூவரை யானைகள் தாக்கியதில் ஒருவர் பலியாகியதுடன் இருவர் படுகாயமடைந்துள்ளனர்.
இந்தச் சம்பவம் அம்பாறை மாவட்டம், சம்மாந்துறை – பெரிய கொக்கனாரை வட்டை பகுதியில் இன்று அதிகாலை இடம்பெற்றுள்ளது.
இதன்போது யானை தாக்கியதில் ஒருவர் சம்பவ இடத்துலேயே உயிரிழந்துள்ளார். மேலும் இருவர் படுகாயங்களுடன் வைத்தியசாலைகளில் சேர்க்கப்பட்டுள்ளனர்.
மூன்று பிள்ளைகளின் தந்தையான மட்டக்களப்பு, தரவை 1 கிராம சேவையாளர் பிரிவைச் சேர்ந்த குடும்பஸ்தரே (வயது 55) சம்பவத்தில் உயிரிழந்துள்ளார்.
மேலும் இந்தத் தாக்குதலில் காயமடைந்த 29 வயதுடைய இளைஞர் சம்மாந்துறை ஆதார வைத்தியசாலையில் சிகிச்சை பெற்று வருவதுடன் 52 வயதுடைய மலையடி, கிராமம் 2 கிராம சேவையாளர் பிரிவைச் சேர்ந்த குடும்பஸ்தர் சிகிச்சைக்காக சம்மாந்துறை ஆதார வைத்தியசாலையில் சேர்க்கப்பட்ட பின்னர் மேலதிக சிகிச்சைக்காக கல்முனை வடக்கு ஆதார வைத்தியசாலைக்கு மாற்றப்பட்டார்.
சம்பவம் தொடர்பான மேலதிக விசாரணைகளை சம்மாந்துறைப் பொலிஸார் மேற்கொண்டு வருகின்றனர்.
