காஸா பகுதியில் நடைபெற்றுவரும் போர் உடனடியாக நிறுத்தப்படவேண்டுமென வலியுறுத்தி மட்டக்களப்பு – ஏறாவூர்ப் பிரதேசத்தில் வெள்ளிக்கிழமை ஆர்ப்பாட்டப்பேரணி நடைபெற்றது.
காஸா பகுதியில் இஸ்ரேல் படையினரால் நடாத்தப்படும் தாக்குதல்களைக் கண்டித்தும் பலஸ்தினத்திற்கு ஆதரவு தெரவித்தும் இந்த ஆர்ப்பாட்டம் ஏற்பாடு செய்யப்பட்டது.
ஏறாவூர் ஜாமிஅத்து ஜும்ஆப் பள்ளிவாயலில் நடைபெற்ற வெள்ளிக்கிழமை கூட்டுத்தொழுகையினையடுத்து அப்பள்ளிவாயில் முன்றிலிலிருந்து ஆரம்பமான இப்பேரணி மட்டக்களப்பு – திருமலை பிரதான வீதிவழியாக சுமார் ஐந்நூறு மீற்றர் தூரத்தைக் கடந்து மணிக்கூட்டுக்கோபுரச்சந்தியை அடைந்ததும்
ஆர்ப்பாட்டக்காரர்கள் சங்கிலித்தொடராக நின்று கோஷமிட்டனர்.
ஆர்ப்பாட்டக்காரர்கள் பதாதைகள் மற்றும் பாலஸ்தீன் நாட்டின் கொடிகளை ஏந்திச் சென்றனர்.ஸ்ரீ லங்கா முஸ்லிம் காங்கிரஸ் எம்.பி.யான அலிஸாஹிர் மௌலானா இந்த ஆர்ப்பாட்டத்தில் கலந்துகொண்டு வழிநடத்தினார்.
ஆர்ப்பாட்டத்தின் இறுதியில் கையெழுத்துப்பதிவுகள் நடைபெற்றிருந்தமையும் குறிப்பிடத்தக்கது.
